Афера „Фамилијарно Водно“: Елитен рид по нарачка на Груевски
од НОВА објавено на: 16-03-2015
Пишуваат
Владо Апостолов
Сашка Цветковска
Улицата „Водњанска“ кај државната клиника води кон скопската елитна населба Водно. Ако тргнете оттаму кон Водно на самиот почеток на ридот ќе ве пресретне основното училиште „Кочо Рацин“. До нашата дестинација се стигнува доколку се појде нагоре, десно од училиштето. Пеш би стасале за 5 минути, а со автомобил за минута. Од двете страни на улицата ќе ве пречекаат убави вили и неколку резиденции на странски амбасади.
Наша дестинација е улицата „Питу Гули“, односно местото кадешто се наоѓа ридот кој со новиот урбанистички план наместо шума ќе стане населба. Штом ја одминете резиденцијата на американската амбасада и завртите лево ќе ве пресретне калдрместа, мала и тесна уличка кадешто своја резиденција има и британската амбасада, а староседелец е и амбасадорот на Македонија во Шпанија, Слободан Чашуле.
На крајот на уличката почнува ридот со кој вчера „пукна“ десеттата опозициска „бомба“. Претседателот на СДСМ Зоран Заев на прес-конференцијата пушти снимки од телефонски разговори меѓу премиерот Никола Груевски и министерот за транспорт и врски Миле Јанакиески, а во коишто снимки, според обвинувањата на Заев, премиерот нарачува промена на деталниот урбанистички план на Водно, со цел да ја приграби земјата на ридот и да гради куќи, односно згради.
Заев ги обелодени и компаниите коишто ја купиле земјата, компании директно и индиректно поврзани со моќници од власта или од редовите блиски до власта. Една од компаниите е домашна „Кара“ која е дел од групацијата „Орка“ на бизнисменот Орце Камчев, додека другите две компании доаѓаат од земјите кои важат за даночни прибежишта за богатите - кантонот Лугано во Швајцарија („Ексико“) и Белизе во Централна Америка („Сирах лимитед“).
За прв со една од компаниите, онаа од Белизе, може да се поврзе и премиерот Никола Груевски бидејќи управител на фирмата од Белизе е неговиот кум од првиот брак, Ристо Новачевски.
На оваа фотографија може да се забележи каде започнува ридот. Во моментов нагоре има само шума. Доколку се оствари планот на премиерот, калдрмата на „Питу Гули“ ќе ја замени двонасочна улица за да можат сопствениците на резиденции и на згради да стигнат во своите домови на ридот. За да се изгради модерната улица ќе се одземаат делови од дворовите на староседелците, а нив и новите соседи од ридот ќе ги дели голем потпорен ѕид, за каков што премиерот зборува во снимките со министерот Јанакиески.
Откако ќе се пробие ридот и ќе се изградат патот и ѕидот, горе ќе има сосема нова елитна населба со мини згради од два ката и приземје, но и рекреативни и зелени површини за спорт и за одмор.
АНОНИМНИ ОФШОР-ФИРМИ ГИ КРИЈАТ ЛУКРАТИВНИТЕ ПОЛИТИЧКИ АГЕНДИ
„Ексико“ е веројатно најуспешната анонима компанија во Македонија, иако е формирана уште во далечната 2001 година. Денес како нејзин сопственик се води швајцарската „T&MJ Инвестмент СА“ - лоцирана во Лугано, а на истата адреса регистрирани се уште десетици други фирми. За прв пат името на фирмата во медиумите се појави во 2005 година, кога весниците објавија дека „Ексико“ и „Мала Богородица“ имале градежни активности под хотелот „Панорама“.
Во изминативе години „Ексико“ се јави како акционер во „Стопанска банка АД - Битола“, Земјоделскиот комбинат „Пелагонија“ и во познатата градежна компанија „Бетон“ АД - Штип. „Ексико“ свој удел има и во хотелот „Ибис“ кој се наоѓа во непосредна близина на скопскиот плоштад, веднаш до новото седиште на „Комерцијална банка“.
Портпаролот на СДСМ, Петре Шилегов, лани на прес-конференција праша дали шефот на тајната полиција и братучед на Груевски, Сашо Мијалков, стои зад „Ексико“. Мијалков демантираше, најави тужба против Шилегов, меѓутоа досега никој не објасни чија е „Ексико“, ниту пак се појави нејзиниот вистински газда.
„Фокус“ минатата година пишуваше и дека „Ексико“ и познатата агенција за обезбедување СГС, делеле иста адреса.
„СТРАНСКИТЕ ИНВЕСТИЦИИ“ ОД БЕЛИЗЕ
Последниве неколку години во Скопје основани се четири компании чиишто непознатни сопственици се лоцирани во средноамериканската земја Белизе, којашто во светот е позната како офшор-дестинација, држава со ниски даноци и место кадешто може комплетно да се сокрие сопствеништвото на одредена фирма. Токму затоа никој во Македонија не знае кои се сопствениците на овие четири компании.
Она што со сигурност се знае е дека нивните газди се лоцирани на иста адреса во Белизе сити (1 ½ „Мајлс нортен хајвеј) и тоа најверојатно е некаква адвокатска канцеларија.
Ова се четирите компании и нивните бизниси во Скопје:
1. „Базики лимитед“
[Искра ММ - станбен комплекс кај фабриката ФАС 11 Октомври]
„Базики лимитед“ од Белизе заедно со уште една компанија и со еден бизнисмен ја поседуваа градежната компанија „Искра ММ“. Покрај „Базики лимитед“ во „Искра ММ“ како сопственик се јавува бизнисменот Цветан Панделески, инаку татко на Дејан Панделески - кумашинот на министерот за транспрот и врски Миле Јанакиески. Панделески е извршен директор во АД Пелистерка. И покрај „Базики лимитед“ и Цветан Панделески во „Искра ММ“ како партнер се јавува и фамозната фирма со швајцарски капитал од Лугано - „Ексико“.
„Искра ММ“ во медиумите се најавуваше како инвеститор на голем станбен комплекс во скопска Гази Баба, во непосредна близина на поранешната фабрика за автобуси ФАС 11 Октомври. Опозицијата во 2011 година обвинуваше дека изградбата на овој објект, меѓудругото, е една од причините зошто власта го рушеше „Космос“ на Фиат Цаноски.
2. „Иресине лимитед“
[Портал и неделник „Република“]
„Иресине лимитед“ од Белизе преку фирмата „Прва Република“ стoи зад порталот republika.mk и зад неделникот „Република“. Не се знае кој е сопственик на „Иресине лимитед“, а тоа досега не го откриле ниту генералниот директорот на „Прва Република“ Доне Доневски, ниту пак маркетинг директорот на оваа фирма, Стојан Георгиевски - Тото.
3. „Игра инвест лимитед“
[Спортски центар „Јане Сандански“ и Хотел Русијa]
„Игра инвест лимитед“ од Белизе е газда на кипарската компанија „Бет сити лимитед“ која стоеше зад изградбата на новиот спорстски центар „Јане Сандански“ и хотелот „Русија“ во скопски Аеродром. Во јавноста, како сопственик-концесионер на овие објекти беше презентиран рускиот бизнисмен Сергеј Самсоненко, меѓутоа тој одбива да објасни која е фирмата од Белизе.
4. „Сирах лимитед“
[Плацеви на Водно од 11.000 метри квадратни]
„Сирах лимитед“ е компанијата од Белизе за којшто лидерот на СДСМ, Зоран Заев тврди дека поседува две катарстарски парцели во парк-шумата Водно кои заедно се простираат на повеќе од 11.000 метри квадратни. Според Заев управител на „Силмах лимитед“ е кумот на Груевски од првиот брак, Ристо Новачевски, чија сестра била и најверојатно сѐ уште работи во кабинетот на Никола Груевски.
КАКО ОПШТИНА ЦЕНТАР ЈА ИЗГУБИ БИТКАТА ЗА РИДОТ
Но, што всушност говори Груевски во снимките? Според Заев, тој и министерот Јанакиески во разговорите ја заговараат промената на урбанистичкиот план. Овој детален урбанистички план досега е менуван повеќе пати. Околните жители ја раскажуваат историјата на ридот. Според нив, уште во раната историја на Југославија, федералните служби посакале на ридот да градат резиденции за амбасади.
По извршените мерења и анализи службите заклучиле дека градењето е неможно и опасно поради лизгавиот терен. Па така, местото останува да биде шума. Првиот политичар кој фрлил „око“ на ридот е токму Љубчо Георгиевски во времето кога е премиер, раскажува жител кој што сака да остане анонимен.
Силниот отпор на мештаните и замешувањето на локалната самоуправа го спасува ридот од планот да стане населба. Во тоа време, сепак се прави одредена промена, па во урбанистичкиот план наместо шума се предвидува маркица за спортско-рекреативни површини.
Парцелата своевремено ја „меркаше“ и кошаркарот Пеце Наумовски кој стига дотаму да почне и да ја сече шумата, што се уште е видливо, но го спречува поранешниот градоначалник на Скопје, Ристо Пенов.
Последната и најдраматична промена е направена минатата година на контроверзната седница на Советот на општина Центар по аспењето и по ослободувањето на претседателот Мирослав Шиповиќ. Промените во планот кој предвидува населба се нацртани кон крајот на мандатот на поранешниот градоначалник Владимир Тодоровиќ, но по победата на Андреј Жерновски во Центар планот не стига до гласање. Тогаш опозициските советници на општина Центар ја напуштија седницата и останатите членови го изгласаа деталниот урбанистички план.
Градоначалникот на Центар Андреј Жерновски тврдеше дека Законот го обврзува да ги потпишува сите одлуки на Советот и дека тој бил немоќен да го спречи носењето на Деталниот урбанистички план. Тој целата постапка ја обжали на Уставниот суд бидејќи тврдеше дека урбанистички планови се носат единствено со мнозинство гласови од сите советници, а не само од присутните советници. Уставниот суд досега не се произнесе за иницијативата.
Груевски демантира: Немам земја, тоа се лаги и измислици
Најостро ги демантирам, како целосно невистинити, наводите изјавени од Зоран Заев за тоа дека наводно сум купувал градежни плацеви и дека наводно сум сопственик на било каков плац, или пак на било каков начин поседувам имот надвор од оној кој е пријавен во мојот анкетен лист, кој е јавно објавен. Овие наводи се целосно измислени и невистинити.
http://www.novatv.mk/index.php?navig=8&cat=20&vest=20968
Home
Latest images
Регистрирајте се
Влез
Предмет: Груевски го ПРИЗНА криминалот 
